Sut ydyn ni wedi cynnwys pobl â dementia, gofalwyr a gweithwyr proffesiynol

Rydyn ni wedi cynnal sawl digwyddiad i edrych ar ffyrdd o wella gwasanaethau a chymorth i bobl sy’n byw gyda dementia, gan gynnwys:

• Cyfres o hacathonau i lywio ein cynlluniau (mae hacathonau’n dod â gweithwyr proffesiynol a phobl â phrofiadau byw ynghyd i edrych ar ffyrdd o fynd i’r afael â phroblemau a heriau)
• Gweithdy cydgynhyrchu i fapio teithiau cyn ac ar ôl diagnosis i bobl â dementia er mwyn nodi arfer da a ffyrdd o wella’r profiad hwn
• Gweithdy i edrych ar Wasanaethau Asesu Cof i ddylanwadu ar ffordd well o weithio
• Sesiwn trochi ‘hydra minerva’ gyda gweithwyr proffesiynol a phobl â phrofiadau byw
• Cymryd rhan yn ‘Troi Ponty’n Las’, i recriwtio gwrandawyr cymunedol

Sut y gellir gwella gwasanaethau?

I grynhoi, hoffai pobl sy’n byw gyda dementia, eu teuluoedd a’u gofalwyr gael:

• Cefnogaeth ymarferol i ofalwyr ar sut i gefnogi eu hanwyliaid, sut i siarad â nhw a sut i ofalu amdanynt, gan gynnwys sefydlu arferion
• Mynediad at wybodaeth hygyrch, ac i wasanaethau gael eu cydgysylltu
• Mwy o addysg i’r person â dementia, eu teuluoedd a staff i sicrhau bod y wybodaeth a’r gefnogaeth gywir yn cael eu darparu
• Cyfleoedd cymdeithasol ar ôl diagnosis i gynnal eu hunaniaeth
• Atgofion ac eiliadau i’w defnyddio fel man cychwyn sgwrs i gefnogi pobl i gadw’n driw i’w hunaniaeth. Dylid ymgorffori hyn mewn amgylcheddau lle mae pobl yn derbyn gofal a chymorth, fel ein bod yn dal y pethau sy’n arbennig ac yn bwysig i bobl â dementia.

Gallwch ddarllen crynodeb o gylch pob maes isod.

Cael y wybodaeth a’r gefnogaeth gywir

“Allwch chi ddim cael cefnogaeth dda heb wybodaeth am yr hyn sydd ei angen ar bobl o’u safbwynt nhw.”

• Hoffai pobl â dementia a gofalwyr gael cymorth cyn ac ar ôl diagnosis i’w helpu i ddeall mwy am fyw gyda dementia, a’r gwasanaethau a’r cyngor sydd ar gael.

Mae syniadau ar gyfer newid cadarnhaol yn cynnwys:

• Edrych ar waith tebyg sy’n digwydd yn y rhanbarth, a darganfod ffyrdd o rannu adnoddau a syniadau
• Creu deunyddiau cyfathrebu cynhwysol, a darparu cwnsela, cysylltiadau â grwpiau cymunedol, technoleg hygyrch a chyngor ymarferol fel cael mynediad at fudd-daliadau
• Rhannu a dathlu arferion gorau

Taith at ddiagnosis

“Gall fod yn anodd cael pobl â dementia i ymgysylltu oherwydd stigma. Does dim rhaid i’r diagnosis fod yn label brawychus.”

Hoffai pobl â dementia a’u gofalwyr gael cymorth i gael diagnosis amserol, a deall pa wybodaeth a chyngor sydd ar gael wedyn.

Roedd syniadau ar gyfer newid cadarnhaol yn cynnwys:

• Darparu profion iechyd symudol gydag asesiad llesiant gwybyddol fel rhan o hyn
• Parhau i godi ymwybyddiaeth o ddementia i leihau stigma, ac annog pobl i geisio diagnosis

Bywyd ar ôl diagnosis

“Mae angen cefnogi pobl i gynnal eu hunaniaeth.”

Mae pobl â dementia a’u gofalwyr eisiau teimlo y gallant barhau i fwynhau eu bywydau a chael cefnogaeth i gadw eu hunaniaeth a’u diddordebau.

Roedd syniadau ar gyfer newid cadarnhaol yn cynnwys:

• Gwasanaethau i fod ar gael mewn cymunedau lleol fel eu bod yn hawdd eu cyrchu
• Elusennau i helpu pobl â sgiliau digidol i ehangu eu mynediad at wasanaethau cymorth
• Creu mwy o gymunedau cyfeillgar i ddementia
• Datblygu hybiau lleol i ofalwyr lle gallant dderbyn mwy o wybodaeth e.e. dosbarthiadau coginio, mannau i anadlu, cysylltu a datblygu rhwydweithiau