Pam fod angen ein diffiniad ein hunain arnom ar gyfer cyd-gynhyrchu yng Nghwm Taf Morgannwg?

Yn ei hanfod, mae cyd-gynhyrchu’n ail-gydbwyso strwythurau grym er mwyn creu llwyfan cyfartal, cytbwys ac ymddiriedol ble gall pbol ddod o hyd i atebion gyda’i gilydd.

Ym maes iechyd a gofal cymdeithasol, gallai hyn olygu fod rhywun â phrofiad byw a gweithiwr proffesiynol yn cydweithio i wella gwasanaeth.

Mae ymchwil a wnaed gan brosiect Mae Ein Llais yn Cyfri yn 2019 yn dangos fod gan bobl ddealltwriaeth gyffredinol o gyd-gynhyrchu yng Nghwm Taf Morgannwg.

Gwyddom fod ieithwedd yn gallu bod yn rhwystr. Weithiau gellir diffinio cyd-gynhyrchu mewn sawl ffordd, gan greu dryswch ac anhawster wrth roi bys ar sut mae cyd-gynhyrchu da’n edrych.

Er mwyn taclo’r rhwystr hwn, rydym ni wedi gweithio gyda phobl sydd â phrofiadau byw, a gweithwyr proffesiynol i greu ein diffiniad ein hunain.

Dewiswyd y geiriau yn ein diffiniad yn ofalus gan bobl syn byw ac yn gweithio yn ein rhanbarth.

Drwy ddefnyddio iaith sy’n bwysig i’n cymunedau, rydyn ni mewn lle da i gychwyn ar gyd-gynhyrchu!

Sut gyrhaeddon ni i’r fan hon?

Mae Rhwydwaith Cyd-gynhyrchu Cymru yn disgrifio cyd-gynhyrchu fel hyn*:

Ystyr cyd-gynhyrchu (gwasanaethau cyhoeddus) yw fod pobl sy’n darparu ac yn cyflawni gwasanaethau, a phobl sy’n cael mynediad i’r gwasanaethau hyn ac yn eu derbyn, yn rhannu grym a chyfrifoldeb, ac yn cydweithio er budd cyffredin mewn perthynas gyfartal, gytbwys a gofalgar.

Mae’n galluogi:

• Pobl i gael mynediad i gefnogaeth ystyrlon pan fo’i angen
• Gwasanaethau i fod yn effeithiol, ac i wneud gwahaniaeth cadarnhaol i fywydau pobl
• I bobl, gwasanaethau a chymunedau ddod yn asiantwyr mwy effeithiol i newid.

*trwy garedigrwydd Rhwydwaith Gyd-Gynhyrchu Cymru

Cyd-gynhyrchu’r hac-a-thon Cyd-gynhyrchu

Mae cyd-gynhyrchu’n cymryd amser.

Os yw’n cael ei wneud yn effeithiol, bydd yn helpu i oresgyn rhwystrau, a chanfod atebion, er mwyn galluogi i wasanaethau gael eu creu i ateb angehnion y rheiny sydd ei hangen mewn modd go iawn.

Ym mis Medi 2022 fe ddaethon ni â phobl oedd â phrofiadau byw ynghyd â gweithwyr proffesiynol i edrych ar sut y gallwn gyd-gynhyrchu’n fwy effeithiol fel rhanbarth.

Fe dreulion ni’r diwrnod ar fformat ‘hac-a-thon’. Bydd hac-a-thon yn para tua phedair awr, ac mae’n gweld grwpiau bach yn gweithio gyda rhywun creadigol proffesiynol i edrych ar heriau, ac amlygu sut i’w datrys ar y cyd mewn ffordd wahanol ac arloesol.

Darllen ein canfyddiadau yma.

Cyd-ddadansoddi gwybodaeth

Cafodd yr holl wybodaeth a gasglwyd drwy’r digwyddiad hwn ei goladu a’i gyflwyno wedyn i dîm cyd-ddadansoddi llai, oedd wedi hunan-gyfeirio, o 15 unigolyn, aeth ati i archwilio’r holl feddyliau a syniadau roedd pobl wedi’u cynnig yn yr hac-a-thon Cyd-gynhyrchu, a thrwy gyfrrwng cyfres o weithgareddau, fe amlygwyd cyd-gyffredinedd geiriau, ystyr a bwriad i gyd-gynllunio’r diffiniad rhanbarthol terfynol o gyd-gynhyrchu.

Wedyn fe ymgymeron ni gyfres o weithgareddau i wirio ystyr, gan roi cyfle i ragor o bobl fwydo i mewn a bod yn rhan o’r broses, tan i gymeradwyaeth derfynol gael ei chanfod gan y Bwrdd Partneriaeth Rhanbarthol, sydd ers hynny wedi cymeradwyo mabwysiadu’r diffiniad hwn.

I gyd, cymerodd 183 unigolyn o bob cwr o ranbarth Cwm Taf Morgannwg ran mewn datblygu’r diffiniad hwn, a lansiwyd yn swyddogol ddydd Gwener 19 Mai 2023, fel rhan o Wythnos Gyd-Gynhyrchu Cymru.