Hac-a-thon hygyrchedd ym maes iechyd a gofal cymdeithasol

Cefndir

Fe fuon ni’n edrych ar y blaenoriaethau a amlygwyd gan bobl ag anableddau corfforol a nam ar y synhwyrau yn ein Hasesiad o Anghenion y Boblogaeth a thrafod beth sydd angen ei newid a’i wella, fel y gallwn ni  adeiladu cymunedau cryf a gwydn ar gyfer y dyfodol.

Canfyddiadau allweddol

Rhaid i bobl â phrofiadau byw a gweithwyr proffesiynol gydweithio i ysgogi newid ystyrlon.

Yn ystod ein hac-a-thon ar hygyrchedd ym maes iechyd a gofal cymdeithasol, rhannwyd pawb yn grwpiau i edrych ar:

• Anableddau corfforol a chymunedau hygyrch
• Cyfathrebu hygyrch
• Byw gyda cholli clyw

Isod rydyn ni wedi rhannu rhai o’r canfyddiadau allweddol o’r hac-a-thon.

Anableddau corfforol a chymunedau hygyrch

“Mae angen i bawb gydweithio i wneud iddo ddigwydd”

Bu’r tîm yn cydweithio i greu celf ac ysgrifennu cân i amlygu pwysigrwydd cymunedau hygyrch i bobl ag anableddau corfforol.

Ymysg y syniadau ar gyfer newid cadarnhaol roedd:

• Gweithio gyda phartneriaid i sicrhau bod pobl yn gallu cyrraedd apwyntiadau’n hawdd, a bod cymorth hygyrch ar gael pan fydd pobl yn cyrraedd
• Sicrhau bod gwybodaeth hygyrch a chyfredol ar gael i gyd-fynd ag anghenion y person – rhaid cofio nad yw pawb ar lein
• Argaeledd gwasanaethau gofal sylfaenol arbenigol i sicrhau bod pobl ag anableddau yn cael y gofal cywir

Cyfathrebu hygyrch

“Mae angen i ni ddefnyddio cyfleusterau cymunedol i ddod â’r gymuned ynghyd”

Bu’r grŵp yn gweithio gyda’i gilydd i ddatblygu sgetsys drama am eu profiadau o gyfathrebu.

Ymysg y syniadau ar gyfer newid cadarnhaol roedd:

• Creu sianeli cyson a hygyrch ar gyfer cyfathrebu – gan gynnwys defnyddio gwahanol ddulliau gan nad yw un ateb yn addas i bawb
• Ymgorffori cydgynhyrchu mewn ymarfer fel bod cymunedau’n dylanwadu’n uniongyrchol ar sut mae gwasanaethau’n cael eu hyrwyddo a’u trafod
• Mae angen i wasanaethau a sefydliadau werthfawrogi’r defnydd o’r celfyddydau creadigol i ymgysylltu â phobl, gan ddod â’r gymuned ynghyd

Byw gyda cholled clyw

“Tynnwch y gost o adael i bobl ddysgu ein hiaith”

Lluniodd y tîm gerdd ar lafar i ddod â’u profiadau a’u syniadau yn fyw.

Ymysg y syniadau ar gyfer newid cadarnhaol roedd:

• Mae gan Iaith Arwyddion Prydain (BSL) ei hiaith a’i diwylliant ei hun – mae angen datblygu cyfathrebu gan ystyried hyn
• Dylid cynnig opsiynau testun neu e-bost fel dull o gyfathrebu â gwasanaethau iechyd neu ofal cymdeithasol bob amser
• Mwy o ymwybyddiaeth mewn cymunedau am fyddardod neu golli clyw i greu cymunedau sy’n ystyriol o fyddardod
• Darparu codau QR gyda dolenni i fideos gyda chyfarwyddiadau BSL ar gyfer cael mynediad i wasanaethau iechyd, a beth sydd ynghlwm wrth weithdrefnau
• Darparu fframwaith hyfforddi ar gyfer gweithwyr proffesiynol sy’n gweithio ym maes iechyd a gofal cymdeithasol, gan gynnwys modiwlau gorfodol
• Sicrhau bod cymorth iechyd a gofal cymdeithasol wedi’i deilwra i ddiwallu anghenion pobl fyddar a’r rhai sy’n byw gyda nam ar eu clyw

Sut all gwasanaethau gael eu gwella?

I grynhoi, hoffai pobl ag anableddau corfforol a namau ar y synhwyrau weld:

• Codau QR ar ohebiaeth sy’n cysylltu â fideos BSL gyda chyfarwyddiadau ar gyfer gwasanaethau iechyd a gofal cymdeithasol e.e. gweithdrefnau
• Fframwaith hyfforddi ar gyfer pobl sy’n gweithio gyda phobl fyddar a thrwm eu clyw
• Gwybodaeth glir a hygyrch mewn fformatau lluosog a darparu arwyddion da mewn lleoliadau (gan gynnwys llecynnau gwyrdd)
• Gwybodaeth yn cael ei rannu mewn fformatau sy’n addas ar gyfer pobl sy’n fyddar neu’n drwm eu clyw, gan gynnwys drwy e-bost a neges destun
• Cymorth addas yn cael ei ddarparu mewn lleoliadau iechyd, er enghraifft ‘system cyfeillio’ fel y gall pobl sy’n fyddar neu’n drwm eu clyw gael y cymorth sydd ei angen arnynt yn gyflym